Pagpangsilot sa mga military assets, ginakalipay sang mga pumuluyo!

Bukas-kamot nga gina abi-abi sang Pambansang Katipunan ng mga Magbubukid (PKM) sa isla sang Negros kaupod ang sahing mangunguma ang implementasyon sang rebolusyonaryong hukmanan pinaagi sa mga Pulang hangaway sa idalum sang Apolinario Gatmaitan Command-New People’s Army Regional Operations Command (AGC-NPA) batok sang mga mapanghalit nga asset kag espiya militar, subong man ang mga rapists, nagabaligya sang illegal nga droga, kawatan kag iban pa nga malain nga elemento nga nakakomiter sang mabug-at nga krimen batok sa malapad nga pumuluyo ilabi na sa sahing mangunguma.

Nangin instrumento sila sa giyera kontra-pumuluyo nga ginalunsar sang rehimeng US-Marcos kag mga galamay sini kaupod ang mersenaryong Armed Forces of the Philippines (AFP) kag Philippine National Police (PNP) sa lapnagon kag madamuan nga paglapas sang tawhanong kinamatarong kaangay sang pagpamatay, pagpamomba sang kabukiran, red-tagging, pagpangastigo, pagpamahug, pagpangransak sang mga kabalayan kag iban pa kontra sa mga pumuluyo, mga progresibong sahi kag sektor nga nagahimakas para sa makatarungan nga pagpangabuhi kag hustisya.

Dugang pa, ginagamit man sila bilang giya sa mga operasyon militar kag tigpaniktik sa mga aktibidad sang mga pumuluyo nga ginapasibangdan nga tigsuporta ukon katapo sang NPA.

Taliwas sa ginpahayag sang AFP nga mga “lunsay nga mga sibilyan” ang ginpahamtangan sang NPA sang rebolusyonaryong hustisya, apang sa pagkamatuod, diri nagasandig ang mga regular nga opisyal sang inteledyens sang AFP nga makakuha sang mga datus nga pagagamiton sa ila ilunsar nga operasyon kombat.

Nagbunga ini sang dako nga kahalitan sa kabuhi kag palangabuhian sang mga pumuluyo labi na sang masang mangunguma nga masami ang nangin biktima sang sini nga kalakasan sa pihak sang nagalala nga kapigaduhon, kawad-on sang duta nga palangabuhian, nagataas nga presyo sang balaklon, gamay nga sweldo kag halos wala sang benepisyo kag wala pa makatibawas sa kahalitan sang kalamidad nga natagamtaman sang pumuluyo.

Tungod sini, wala nagakalingkang ang pumuluyo kag indi matay-og ang ginahatag nga suporta sang mga mangunguma sa ila ginakabig nga tinuod nga hangaway- ang NPA, nga padayon nga nagapangapin sa ila kabuhi kag palangabuhian.

Pinaagi sa paghiliugyon sang mga Pulang hangaway kag malapad nga katawhan mahawanan ang banas kag maabot naton ang matuod nga kahilwayan kag kadalag-an.

The post Pagpangsilot sa mga military assets, ginakalipay sang mga pumuluyo! appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.